Parachichi nchini India yanapatikana kwa wingi kupitia uagizaji kutoka nje, huku soko likiwa katika hali ya kawaida bila mabadiliko makubwa kwa sasa, amesema Abdul Kadir Memon, Mkurugenzi wa Abacate International na Mkuu wa Maendeleo ya Biashara na Ununuzi.
Amesema upatikanaji wa parachichi kwa sasa uko katika kiwango cha wastani na chenye afya kibiashara. “Msimu wa Tanzania ulianza mapema kidogo mwaka huu, ambapo mizigo iliwasili mwezi Januari badala ya dirisha la kawaida la Februari. Hali hiyo ilifanya usambazaji kuwa thabiti katika mwezi wa Januari na soko kubaki katika uwiano. Kwa sasa, haiwezi kusemwa kuwa kuna uhaba au ziada kubwa; kiwango ni cha wastani. Hata hivyo, msimu unapoingia katika kilele chake, ujazo unaoingia sokoni unaongezeka na kuanza kuathiri mwenendo wa bei,” alieleza.
Kwa mujibu wa Memon, nchi za Australia na Kenya ziliongeza ujazo wa usambazaji kufidia upungufu huo wa muda. Alisema matunda kutoka Australia, ambayo kwa kawaida hulenga soko la hadhi ya juu, yalipanua wigo wake kidogo zaidi ya niche yake ya kawaida msimu huu kutokana na pengo la muda lililotokea Tanzania.
“Hata hivyo,” alisisitiza, “Tanzania inaendelea kuwa mhimili wa uagizaji wa parachichi wa India. Asili nyingine hushindana pale kunapotokea mapengo ya usambazaji, lakini kimuundo, Tanzania bado ni chanzo kinachopendelewa na chenye umuhimu mkubwa zaidi.”
Kwa upande wake, Shahid Patka, Mkurugenzi wa Abacate International na Mkuu wa Mauzo na Uendeshaji, amesema Tanzania bado ni mchezaji mkuu katika usambazaji wa parachichi kwenda soko la India.
Amebainisha kuwa Tanzania inaendelea kuwa chanzo kikuu kwa soko la India kutokana na faida ya ushuru wa sifuri na muda mfupi wa usafirishaji, jambo linaloifanya kuwa chaguo lenye ushindani mkubwa kibiashara.
