Dar es Salaam – Rais wa Tanzania, Samia Suluhu Hassan, ametoa wito kwa pande zote zinazohusika katika mgogoro wa Jamhuri ya Kidemokrasia ya Kongo (DRC) kusitisha mapigano mara moja na kushiriki katika mazungumzo ya amani.
Akizungumza katika Mkutano wa Pamoja wa Wakuu wa Nchi na Serikali wa Jumuiya ya Afrika Mashariki (EAC) na Jumuiya ya Maendeleo Kusini mwa Afrika (SADC) uliofanyika Ikulu, Dar es Salaam, Rais Samia alisisitiza umuhimu wa kutafuta suluhisho la kudumu linaloheshimu uhuru wa taifa na kuhimiza ujumuishi.
Katika mkutano huo, Rais wa Kenya, William Ruto, pia alisisitiza umuhimu wa kusitisha mapigano, huku akilitaka kundi la waasi la M23 kusitisha mashambulizi yake na jeshi la DRC kujizuia na hatua za kulipiza kisasi. Alisema kusitisha mapigano mara moja kutatoa fursa kwa mazungumzo ya kujenga na utekelezaji wa makubaliano ya amani ya kudumu.
Mkutano huo umehudhuriwa na viongozi mbalimbali wa kanda wakilenga kutafuta suluhisho la mgogoro unaoendelea nchini DRC.
