Mkoani Morogoro, Rais Samia Suluhu Hassan ameanza ziara yake ya kikazi mkoani Morogoro kwa kuzindua Daraja la Berega, mradi ambao unatajwa kuwa na mchango mkubwa katika kuboresha maisha ya wananchi wa eneo hilo. Rais Samia, akizungumza wakati wa uzinduzi huo, alielezea umuhimu wa daraja hilo katika kuunganisha wananchi na kurahisisha upatikanaji wa huduma za jamii.
“Daraja hili limesaidia kutuunganisha wananchi pia kurahisisha upatikanaji wa huduma za jamii,” alisema Rais Samia, akionyesha matumaini yake kwamba daraja hilo litakuwa msaada mkubwa kwa wananchi wa Berega na maeneo ya jirani.
Daraja la Berega lililozinduliwa na Rais Samia Suluhu tarehe 02 Agosti 2024
Kabla ya ujenzi wa daraja hilo, wakulima walikuwa wakikumbana na changamoto nyingi za kusafirisha mazao yao, wakilazimika kutumia pikipiki kuvusha mazao katika maeneo yenye changamoto za kiinfrastruktura. Hata hivyo, Rais Samia alibainisha kuwa sasa, kwa kuwepo kwa daraja hili, magari makubwa yanaweza kupita kwa urahisi, na hivyo kurahisisha biashara na kuinua uchumi wa eneo hilo.
“Badala ya kutumia pikipiki kuvusha mazao kama mlivyokuwa mkifanya, sasa magari makubwa yanayochukua mazao kwa wingi yatakuwa yanapita kwenye daraja hili na biashara itakwenda kunawiri,” alisisitiza Rais Samia.
Akieleza zaidi juu ya matumizi bora ya fedha za mradi huo, Rais Samia alifafanua kuwa kuna kiasi cha shilingi bilioni 1.2 kilichosalia kutokana na ujenzi wa daraja hilo, fedha ambazo zitasaidia kuboresha zaidi miundombinu katika eneo hilo.
“Engineer amesema wamefanya matumizi mazuri sana ya fedha kwenye daraja hili na kumebakia fedha kama bilioni 1.2 ambayo tunakwenda kuunganisha sasa barabara inayotoka hapo ng’ambo ya daraja mpaka Kikuyu. Tunakwenda kuijenga barabara iweze kupitika wakati wote,” alieleza.
Katika jitihada za kuimarisha zaidi usafiri na uchumi wa eneo hilo, Rais Samia aliahidi kuwa serikali itaendelea kuboresha miundombinu kwa kujenga madaraja zaidi na makaravati pamoja na kuboresha barabara.
“Tunaenda kujenga madaraja 6 na makaravati 15 na barabara itakuwa katika hali ya changarawe. Tunaamini barabara hiyo inaweza ikatumika katika misimu yote na kurahisisha usafiri wa wanadamu na bidhaa,” alisema Rais Samia.
Kwa kumalizia, Rais Samia aliwahakikishia wananchi kuwa serikali yake itaendelea kuondoa changamoto zinazowakabili kadri hali inavyoruhusu.
“Kazi yetu kama serikali ni kuondoa changamoto za wananchi na niwaahidi tunakwenda kuziondoa kila hali inaporuhusu,” aliahidi Rais Samia.
Ziara hii ya Rais Samia inatarajiwa kudumu hadi tarehe 7 Agosti, na inajumuisha miradi mingine mbalimbali ya maendeleo katika mkoa wa Morogoro.
