Mamlaka za Tanzania zimewakamata raia watano wa Kenya, wakiwemo maafisa wawili wa polisi, baada ya kuvuka mpaka katika eneo la Horohoro kwa lengo la kumkamata mtuhumiwa aliyekuwa amekimbilia upande wa Tanzania.
Watu hao watano walikamatwa katika mpaka wa Horohoro, ambapo silaha za maafisa hao wa polisi zilitaifishwa huku hatua zaidi zikisubiriwa kuchukuliwa dhidi yao.
Akithibitisha tukio hilo, Afisa wa Tanzania anayesimamia Kituo cha Huduma za Pamoja Mpaka (One Stop Border Post – OSBP) katika eneo la Lunga Lunga, Bw. Earnest Lukaza, alisema kukamatwa kwao kulitokana na kukiuka sheria na taratibu za Jumuiya ya Afrika Mashariki.
“Napenda kuthibitisha kuwa Wakenya watano walikamatwa kwa kufanya zoezi la kumkamata mtuhumiwa kinyume cha sheria na Sheria ya OSBP ya Jumuiya ya Afrika Mashariki ya mwaka 2016. Wanapaswa kufikishwa kwa hatua zaidi,” alisema Bw. Lukaza katika taarifa ya ndani.
Kwa mujibu wa polisi wa Kenya, maafisa wawili waliokamatwa ni wa Kituo cha Polisi Tononoka jijini Mombasa. Inadaiwa kuwa walikuwa na silaha na walikuwa wameambatana na mlalamikaji wakati walipokamatwa na polisi wa Tanzania.
“Taarifa hii ni kuwajulisha kuwa leo Jumanne majira ya saa 3:30 asubuhi, Konstebo Patrick Kithinji na Konstebo Amed Ali, wote wa ofisi ya upelelezi ya Kituo cha Polisi Tononoka, walikamatwa na mamlaka za Tanzania katika eneo la Horohoro. Walidai kuwa walikuwa wamekwenda kumkamata Bw. Omar Ali kwa kosa la kujipatia fedha kwa njia ya udanganyifu lililotokea Tononoka,” ilisomeka sehemu ya taarifa ya polisi kutoka Kituo cha Polisi Lunga Lunga.
Polisi wa Kenya waliongeza kuwa watu wengine waliokamatwa ni Mwenyekiti wa Mamlaka ya Maendeleo ya Ukanda wa Pwani (Coast Development Authority), Mzee Mwinyi Mzee, mlalamikaji Sofia Mguza pamoja na dereva Axikadir Adam Ganyure.
