Siku moja baada ya Umoja wa Ulaya (EU) kupitisha azimio la kusitisha msaada wa Euro milioni 156 (takriban Sh bilioni 400) uliokuwa umetengwa kwa ajili ya Tanzania mwaka 2026, serikali imesema inaendelea kufuatilia kwa karibu suala hilo.
Akizungumzia uwezekano wa kupotea kwa ufadhili huo wa EU, Waziri wa Mambo ya Nje wa Tanzania, Balozi Mahmoud Kombo, amesema Tanzania haitakabiliwa na mgogoro wowote, akisisitiza kuwa nchi ina bajeti yake pamoja na vyanzo vingine vya mapato.
“Fuatilieni mijadala mtandaoni ili muone ni kiasi gani tunaweza kupoteza. Watanzania hawatakuwa na njaa kwa sababu ya jambo hili. Linganisheni kiasi cha fedha kinachotolewa na EU na bajeti yetu ya mwaka mzima muone kinachowakilisha asilimia ngapi,” alisema.
BAJETI YA TAIFA YA TANZANIA 2025/2026
Jumla: Sh trilioni 56.49
Vyanzo vya mapato:
Mapato ya Ndani: Sh trilioni 40.47
Mikopo ya Ndani na Nje: Sh trilioni 14.95
Misaada kutoka nje: Sh trilioni 1.07
Azimio la EU la kusitisha ufadhili kwa Tanzania lilipitishwa kwa kura 539 za ndio, hakuna kura ya hapana, huku Wabunge 27 wakijizuia kupiga kura.
