Said Hassan Fella maarufu kama Mkubwa Fella ambaye ni mmoja kati ya mameneja wa msanii nyota nchini Tanzania, Naseeb Abdul a.k.a Diamond Platnumz, amethibitisha kwamba hivi karibuni kuna msanii mwingine atatoka kwenye lebo ya Wasafi huku akikataa kutaja jina la msanii huyo.
Akihojiwa kwenye kipindi cha Refresh kinachorushwa na Wasafi, Mkubwa Fella amesema aliongea na Diamond Platnuzm na kumuuliza kama msanii anayetoka sasa hivi wamekorofishana au anaondoka kwa mema.
“Mfano mdogo juzi nimemuuliza Naseeb Abdul na huyu anayeondoka kakudhulumu?, akaniambia ‘muziki wa Bongo Fleva nimeshaujua,’” amesema Fella.
Itakumbukwa kwamba Harmonize pia aliwahi kuwa mmoja wa msanii chini ya lebo hiyo na kuondoka kwake kulizua mtafaruku mkubwa baina ya pande zote mbili.
Katika habari nyingi Fella anedokeza kuwa kwa sasa ameamua kutambulisha kundi lingine la Yamoto Band linalojumuisha vijana watano kutoka mikoa tofauti na kuomba wananchi wawapokee na kuwapa ushirikiano kama waliopewa kundi lililopita lililojumuisha wasanii, Mbosso, Enock Bella, Aslay na Beka flavor.
