Takribani miaka 2 tangu kifo cha Mwasisi wa Makanisa ya Mlima wa Moto Mikocheni ‘B’, Getrude Rwakatare na sasa nafasi hiyo inachukuliwa na Rose Mgetta ambaye amesimikwa rasmi kuwa kiongozi wa makanisa hayo.
Askofu Rose Mgetta mara baada ya kusimikwa aliushukuru uongozi wa kanisa hilo kwa kuamini kwamba anaweza kuifanya kazi hiyo kwa ufanisi na kuamua kumsimika rasmi kumrithi Dk. Rwakatare.
“Mwasisi wa Kanisa hili Dk. Rwakatare alinilea vizuri sana na nilikuwa chini yake kwa muda mrefu ni mtu aliyependa kuwainua wanawake na mmoja ni mimi hivyo nawaahidi waumini na kanisa kazi iliyotukuka,” alisema Askofu Rose.
Ibada ya kumsimika Rose iliendeshwa na Askofu wa Makanisa ya ELIM Pentecoste Tanzania, Peter Konki, kwenye Kanisa la Mlima wa Moto Mikocheni ‘B’ mkoani Dar es Salaam na kuhudhuriwa na waumini wa kanisa hilo na wageni mbalimbali.
